Humdrum observations

Hey everyone,

This is a brief extract from my third book. Aldo is standing outside his local 'The Carouel'taking in the scene of punters everyday life.

Later that evenin, efter ah’ve taken Bruce fur a walk and enjoyed a bite tae eat wae the faimily. Ah find masel standin ootside The Carousel, leanin against the wah. Puffin a ciggie hard and fast. No that ah’m plannin oan steyin very long. Since ah’ve still tae visit Dom tae deliver the verdict ae ma mediation skills. In the meantime, ah plan tae huv a couple ae beers wae the lads tae unwind. Even though ah ken that moody prick Dougie will nae doot still hae a sharp axe tae grind. Buses and motors whizz past leavin a distinct smell ae oil and exhaust fumes. Enough air pollution tae provoke an asthma attack in Superman. Drunken laughter wafts acroass fae the pissheids who often find thumselves seekin shelter in this boozer. Auld timers wae half smoked rollies hangin loose fae their mooths and a cheap pint in their hand. Maist ae these members ae a bygone era huv steyed glued tae the same spoat fur the past forty years. In expectation ae a news bulletin comin through announcin coal and shipyairds huv made a shockin comeback. These fellas are unable tae swallae the bitter pill that society deserted thum donks ago. Thus, this particular local offers thum suttin nae ballot boax kin. A sense ae belongin. A safe space where they kin ignore the painful truth that the newly elected PM is waitin in the wings tae personally euthanise each member ae their stranded generation. The community lepers drift back inside. Where ah imagine they’re hopin the Daily Record’s horse racin section will provide a cure fur their desperately low funds.